Монгол, Оросын батлан хамгаалах салбарын хамтын ажиллагааг өргөжүүлэн бэхжүүлнэ

Монгол Улсын Батлан хамгаалахын дэд сайд Д.Баасандамба манай улсад айлчилж буй Оросын Холбооны Улсын Батлан хамгаалахын орлогч сайд Василий Сергеевич Осьмаковыг хүлээн авч уулзлаа.

Уулзалтаар талууд хоёр улсын батлан хамгаалах салбарын уламжлалт харилцаа, хамтын ажиллагааны өнөөгийн байдал болон цаашдын хөгжлийн чиглэлүүдийн талаар санал солилцлоо. Ялангуяа цэргийн боловсрол, боловсон хүчний бэлтгэл, цэрэг-техникийн хамтын ажиллагаа, эрдэм шинжилгээ, судалгааны чиглэлээр хамтын ажиллагааг гүнзгийрүүлэн өргөжүүлэх боломжийг онцлон хэлэлцсэн байна.

Дэд сайд Д.Баасандамба уг айлчлал нь хоёр улсын батлан хамгаалах салбарын харилцааг улам бэхжүүлэхэд чухал ач холбогдолтойг тэмдэглэв. ОХУ-ын Батлан хамгаалахын орлогч сайд В.С.Осьмаковын Монгол Улсад хийж буй айлчлал 2026 оны 9 дүгээр сарын 27-ноос 29-ний өдрүүдэд үргэлжилж байна.