УЛС ТӨРИЙН ХИЛС ХЭРЭГТ ХЭЛМЭГДЭГСДИЙГ ЦАГААТГАХ, НӨХӨН ОЛГОВОР ОЛГОХ ХУУЛИЙН ТӨСЛИЙГ ДЭМЖЛЭЭ

УИХ-ын Хууль зүйн байнгын хорооны энэ сарын 22-ны өдрийн хуралдаанаар УИХ-ын дэд дарга, Цагаатгах ажлыг удирдан зохион байгуулах Улсын комиссын дарга Б.Пүрэвдоржоос өргөн мэдүүлсэн "Улс төрийн хилс хэрэгт хэлмэгдэгсдийг цагаатгах, тэдэнд нөхөх олговор олгох тухай хуульд нэмэлт, өөрчлөлт оруулах тухай" хуулийн төслийн хэлэлцэх эсэх асуудлыг хэлэлцэж, хуралдаанд оролцсон гишүүдийн 66.7 хувийн саналаар дэмжлээ.

Манай улс 1998 онд уг хуулийг баталснаас хойш хуулийн үйлчлэх хүрээнд хамаарах 31,661 хүний хэргийг цагаатгаж, 931 хүнд 43 тэрбум 780 мянган төгрөгийн нөхөн олговор олгоод байна. Гэвч хуульд заасан нэхэмжлэл гаргах хугацааны хязгаарлалтаас үүдэн хэлмэгдэгсдийн гэр бүлийн 24 иргэн, төрсөн болон үрчилж авсан 27 иргэн нөхөн олговор авч чадаагүй үлдсэнийг сэргээх зорилгоор энэхүү хуулийг санаачилжээ.

ОНЦЛОХ ЗААЛТУУД

• Зөрчигдсөн эрхийг сэргээх: Хуулийн хугацаа дууссаны улмаас нөхөн олговор авч чадаагүй 50 гаруй иргэний эрхийг сэргээж, олгох боломж бүрдэнэ.
• Тусгай хяналтын дэд хороо: УИХ-ын гишүүн Х.Тэмүүжингийн онцолсон Тусгай хяналтын дэд хороог ойрын хугацаанд байгуулахаар ажиллаж байгааг Байнгын хорооны дарга Л.Мөнхбаатар мэдээлэв.
• Гишүүдийн гаргасан санал:
• Хэлмэгдэгсдийг цагаатгасан мэдээллийг нээлттэй, ил тод болгох (П.Сайнзориг)
• Нөхөн олговорт хугацаа заахгүй байх, хэмжээг нь өнөөгийн нөхцөлд тохируулан нэмэгдүүлэх (Б.Баярбаатар, Дам.Цогтбаатар нарын гишүүд)
• Дахин хэлмэгдүүлэлт гаргахгүй байх, газар олгох болон соёлын өвийг сэргээхэд анхаарах

Байнгын хорооноос гарсан санал, дүгнэлтийг УИХ-ын чуулганы нэгдсэн хуралдаанд танилцуулж, эцсийн хэлэлцүүлгийг хийхээр боллоо.