2028 ОН ГЭХЭД ГАДААДЫН ШУУД ХӨРӨНГӨ ОРУУЛАЛТЫГ 5.5 ТЭРБУМ АМ.ДОЛЛАРТ ХҮРГЭХИЙГ ЗОРИНО

Засгийн газрын өнөөдрийн хуралдаанд Шадар сайд Т.Доржханд Хөрөнгө оруулалтыг татах, хадгалах, дэмжих цогц үйл ажиллагааны ажлын төлөвлөгөөний төслийг танилцууллаа.

2026-2028 онд хэрэгжих уг төлөвлөгөө нь Монгол Улсад гадаадын шууд хөрөнгө оруулалтыг татах, орох урсгалыг тогтвортой нэмэгдүүлэх замаар 2028 он гэхэд жилд орох хөрөнгө оруулалтын хэмжээг 5.5 тэрбум ам.долларт хүргэх амбицтай зорилго тавьж байна. Эдийн засгийн өсөлтийг хангах, бүтцийг төрөлжүүлэх, өрсөлдөх чадвар болон шинэ технологи, инновацыг нэвтрүүлэхэд хөрөнгө оруулалт нэн чухал болохыг Шадар сайд онцлов.

ТӨЛӨВЛӨГӨӨНИЙ ҮНДСЭН 5 ЧИГЛЭЛ

1. Эрх зүйн орчин: Хөрөнгө оруулалтын таатай, тогтвортой эрх зүйн орчныг бүрдүүлэх
2. Тогтолцоо: Гадаадын хөрөнгө оруулалт татах нэгдсэн тогтолцоог хөгжүүлэх
3. Чадавхжуулалт: Институтийн чадавх болон хүний нөөцийг бэхжүүлэх
4. Маргаан шийдвэрлэлт: Гадаадын хөрөнгө оруулагчдын гомдлыг түргэн шуурхай шийдвэрлэх
5. Эргэх холбоо (Aftercare): Хөрөнгө оруулагчдыг урт хугацаанд хадгалах, дэмжих тогтолцоог бүрдүүлэх

Тус төлөвлөгөөг Эдийн засаг, хөгжлийн яам, Гадаад харилцааны яам, Сангийн яам болон Цахим хөгжил, инновац, харилцаа холбооны яам хамтран салбар дундын зохицуулалттайгаар хэрэгжүүлэх юм.

2028 он гэхэд жилд орох хөрөнгө оруулалтын хэмжээг 5.5 тэрбум ам.долларт хүргэх