ДОРНОД АЙМГИЙН ЭРҮҮЛ МЭНДИЙН АЖИЛТАН НАР ОРОН СУУЦНЫ УРЬДЧИЛГААНД 20 САЯ ТӨГРӨГИЙН ДЭМЖЛЭГ АВЛАА

Өнөөдөр "Олон улсын сувилагчдын өдөр" тохиож байна. Энэхүү өдөр "Би сувилагч" болзолт уралдааны шилдгүүдийг шалгарууллаа.

Дорнод аймгийн хэмжээнд өнөөдрийн байдлаар эрүүл мэндийн салбарт 1138 ажилтан, ажиллагсад ажиллаж байгаагаас 312 сувилагч нийт 84.9 мянган иргэдэд эрүүл мэндийн тусламж үйлчилгээг хүргэн ажиллаж байна.

Дорнод аймаг нь сүүлийн жилүүдэд хүний нөөцийг тогтворжуулах чиглэлээр идэвхтэй ажиллаж байгаа ба ялангуяа эмч, сувилагчдын дутагдлыг бууруулах, тэдний нийгмийн баталгааг хангах чиглэлээр цогц бодлогыг хэрэгжүүлдэг анхдагч аймаг.

Үүний нэг бодлого бол сувилагчдын нийгмийн баталгааг хангах зорилгоор “Би сувилагч” болзолт уралдааныг 2022 оноос эхлэн зохион байгуулж, өнөөдөр дахин 3 сувилагч шилдгээр шалгарч орон сууц худалдан авах урьдчилгаанд тус бүр 20 сая төгрөгийн дэмжлэгийг авч байна.

Нэгдүгээр байранд: БОЭТ-ийн Мэдээгүйжүүлэг, эрчимт эмчилгээний тасгийн сувилагч Н.Эрдэнэтуяа

Хоёрдугаар байранд: Цагаан-Овоо сумын Эрүүл мэндийн төвийн ахлах сувилагч Б.Мөнхзул

Гуравдугаар байранд: БОЭТ-ийн Гэмтэл согог, бичил мэс заслын тасгийн сувилагч Э.Ханджав нар шалгарсан юм.