Богдхан уулын амьтдыг хамгаалах зорилгоор экологийн гарц байгуулна

Зэрлэг амьтдын нүүдэл, шилжилт хөдөлгөөнийг хангах, амьдрах орчны тасалдлыг бууруулах, дэд бүтцийн шугаман байгууламжийн нөлөөллөөс үүдэх эрсдэлийг бууруулах зорилгоор экологийн гарц байгуулах Санамж бичгийг БОУАӨЯ болон “Эн Си Ди” групптэй байгууллаа.

Богдхан уул бол дэлхийн хамгийн эртний дархан цаазат газруудын нэг. ЮНЕСКО-гийн Шим мандлын нөөц газрын сүлжээнд бүртгэгдсэн байгалийн онцгой үнэ цэнтэй экосистем юм.

Хотжилт, зам, дэд бүтцийн хөгжил нэмэгдэх хэрээр зэрлэг амьтдын амьдрах орчин хумигдаж, нүүдэл шилжилтийн зам нь тасалдах болсон. Ялангуяа халиун буга, бор гөрөөс, цагаан зээр зэрэг туруутан амьтад авто болон төмөр зам, хашаанд хаагдах, осолдох зэрэг эрсдэлтэй тулгарч байна.

Иймээс Байгаль орчин, уур амьсгалын өөрчлөлтийн яам, Богдхан уулын дархан цаазат газрын Хамгаалалтын захиргаанаас зэрлэг амьтдын чөлөөтэй нүүдэллэх нөхцөлийг бүрдүүлэх зорилгоор Хүрхрээгийн ам, Чандманы ам орчимд экологийн гарц байгуулахаар төлөвлөсөн.

БОУАӨ-ийн сайд Ц.Сандаг-Очир, “Экологийн гарц гэдэг нь зөвхөн амьтдыг ослоос хамгаалах, нүүдлийн замыг чөлөөлөх байгууламж биш. Энэ бол хотын хөгжил ба байгаль хамгааллын хооронд зөв зохицол байж болохыг харуулсан бодит шийдэл юм. 

Дэлхийн олон улс, тухайлбал Канад, Нидерланд, Австрали зэрэг орон авто замын дээгүүр, доогуур экологийн гарц байгуулснаар амьтдын нүүдэл шилжилтийг чөлөөлж, зам тээврийн ослыг эрс бууруулсан сайн туршлагатай. 

Эдгээр байршлыг эрдэмтдийн судалгаанд үндэслэн сонгосон, зураг төсөл, ТЭЗҮ боловсруулах бэлтгэл хийж байна. Төлөвлөлтийн энэ үе шатанд зэрлэг амьтдын хамгаалал, иргэдийн аюулгүй байдал, хэрэгцээ шаардлагыг зэрэг хангасан шийдлийг тусгах нь чухал юм” гэлээ. 

Богдхан ууланд 54 зүйл хөхтөн, 194 зүйл шувуу бүртгэгдсэн. Экологийн гарц байгуулснаар амьдрах орчны хуваагдлыг бууруулах, зэрлэг амьтдын нүүдэл шилжилтийг сэргээх, ус болон тэжээлийн эх үүсвэрт хүрэх боломжийг нэмэгдүүлэх, экологийн коридорыг хамгаалах, байгалийн гамшиг, ой хээрийн түймэр зэрэг эрсдэл үүссэн үед амьтад аюултай бүсээс шилжин гарах боломжийг бүрдүүлэх юм.