АНУ-ын Ерөнхийлөгч Дональд Трамп мягмар гарагт консерватив үзэлтэн агсан Чарли Киркэд “Ерөнхийлөгчийн Эрх чөлөөний медаль”-ийг нэхэн олгож, эхнэрт нь гардууллаа

АНУ-ын Ерөнхийлөгч Дональд Трамп мягмар гарагт консерватив үзэлтэн агсан Чарли Киркийг “Жинхэнэ Америкийн баатар”-уудын эгнээнд мөнхжүүлж байна хэмээн мэдэгдэж, түүнд “Ерөнхийлөгчийн Эрх чөлөөний медаль”-ийг нэхэн олгож, эхнэрт нь гардууллаа.

Turning Point USA байгууллагын гүйцэтгэх захирлаар ажиллаж буй түүний эхнэр Эрика Кирк нөхрийнхөө нэрийн өмнөөс шагналыг хүлээн авсан юм. 

Трамп тухайн өдөр Өрнө Дорнодын айлчлалаас шөнө 3 цагийн үед Цагаан ордонд буцаж ирсэн бөгөөд “Би Эрикатай холбогдоод "Эрика, бид ёслолыг баасан гараг руу хойшлуулж болох уу?" хэмээн асуух гэж байсан ч Киркийн төрсөн өдөр болох мягмар гарагийн ёслолд заавал оролцоно гэж шийдсэнээ онцолж, “Би энэ мөчийг дэлхийн ямар ч үйл явдал, асуудлаар сольж чадахгүй байсан” хэмээн мэдэгдсэн байна.

Эрика Кирк шагналыг гардан авч байхдаа Трампад хандан:

“Ерөнхийлөгч өө, миний нөхрийг ийм ёслол төгөлдөр, сэтгэл гарган хүндэтгэж буйд баярлалаа. Мөн Дундад Дорнодын энхийн үйл явцаас ч илүү энэ үйл явдлыг эн тэргүүнд тавьсанд баярлалаа” гэж хэлжээ.

Чарли Кирк “America Comeback Tour” нэртэй аяны үеэр Ютагийн нэгэн их сургуульд оюутнуудтай мэтгэлцэж байхдаа буудуулан амиа алдсанаас хойш дөнгөж нэг сар гаруй хугацаа өнгөрч байна. Тэрбээр амьд байсан бол өчигдөр 32 нас хүрэх байжээ. 

“Тэр үнэнийг зоригтой хэлснийхээ төлөө амьдралынхаа оргил үед амиа алдсан” гэж Трамп мэдэгдээд, уг халдлагыг “аймшигтай, жигшүүртэй, чөтгөрийн шинжтэй” хэмээн тодорхойлжээ.