АЙМГИЙН ЗАСАГ ДАРГЫН САНААЧИЛГААР СОГТУУРУУЛАХ УНДААНД ДОНТОХ ЭМГЭГТЭЙ ИРГЭДИЙГ ЭМЧЛЭХ ТӨСӨЛД 50 ИРГЭНИЙГ ХАМРУУЛЖ БАЙНА

Аймгийн Засаг даргын санаачлагаар Гэмт хэргээс урьдчилан сэргийлэх ажлыг зохицуулах салбар зөвлөл болон “Зөв амьдрах ухаан” ТББ хамтран "Эрүүл нийгэм хариуцлагатай иргэн" төслийг хэрэгжүүлж байна.

Өнөөдөр архины хамааралтай иргэдийг эрүүл мэндийн үзлэг, шинжилгээ болон иргэний бүртгэлийн үйлчилгээнд хамруулж байна.

Тус төслийн хүрээнд архины хамааралд өртсөн иргэдийг соён гэгээрүүлэх, нийгэм, соёлын харилцаанд хэвийн оролцоход нь дэмжлэг үзүүлэх, эрүүл мэндийн эмчилгээ, сувилгаанд хамруулах, согтууруулах ундааны хэрэглээнээс татгалзах зөв дадал хэвшүүлэх, хөдөлмөр эрхлэлтийг дэмжих зэрэг цогц арга хэмжээг хэрэгжүүлж байгаа юм.

Төслийг Улаанбаатар хотод үйл ажиллагаа явуулдаг, архины хамааралтай болон орон гэргүй иргэдийг нийгэмшүүлэн, ажил амьдралд нь чиглүүлж ирсэн туршлагатай, Гэндэндаржаагийн Загдаа тэргүүнтэй “Зөв амьдрах ухаан” ТББ хэрэгжүүлэхээр сонгогдсон байна.

Одоогоор төсөлд хамрагдах иргэдийн ариун цэвэр, эрүүл ахуйн нөхцөлийг хангах, эрүүл мэндийн үзлэг, оношилгоонд хамруулах, иргэний бүртгэлийн зөрчлийг арилгах ажлууд үе шаттайгаар үргэлжилж байна.