АЙМГИЙН ЗАСАГ ДАРГЫН ИВЭЭЛ ДОР СУМДЫН ЗАЛУУСЫН УРЛАГ, СПОРТЫН ИХ НААДАМД 300 ОРЧИМ ЗАЛУУС ОРОЛЦЖЭЭ

Дорнод аймгийн Залуучуудын холбооноос “НЭГДСЭН ЗАЛУУС-ИРЭЭДҮЙН ЭЗЭД” уриатайгаар Дорнод аймгийн 13 сумын залуусын дунд "Урлаг, спортын VII их наадам"-ыг Чойбалсан суманд зохион байгуулж байна.

​Энэхүү наадам нь залуусын нөхөрлөл, эв нэгдэл, манлайлал, бүтээлч оролцоог нэмэгдүүлээд зогсохгүй, цаашлаад ястнуудын өв соёл, ёс заншлаа өвлөн тээх зэрэг олон ач холбогдолтой юм.

Аймгийн Засаг дарга Ш.Ёл нээж хэлсэн үгэндээ: "Аймаг орон нутгаас сумдад дутагдалтай мэргэжлийн залуу боловсон хүчний нөөцийг бүрдүүлэх "Нутгийн ирээдүй" сургалтын тэтгэлэг олгох төсөл,тогтвор суурьшилтай ажиллуулах зорилгоор төрийн албан хаагчдын орон сууцны төсөл, орон нутгийн нэмэгдэл цалин, Залуучуудын гарааны бизнесийг дэмжих “Старт ап” төсөл, ЖДҮ-ийг дэмжих төв, Залуу малчин төсөл, залуучуудын хөгжлийн дэмжих хөтөлбөр гээд залуусынхаа амьдралын зөв алхмыг хийхэд дэмжлэг үзүүлэх, ажлын байраар хангах, хөгжүүлэх, оролцоог нэмэгдүүлэх, амьдрах таатай орчныг бүрдүүлэхэд онцгой анхаарал хандуулж бодлогоо чиглүүлэн ажиллаж байгаагаа онцолж, амжилтыг хүслээ.

Тус наадам 2 өдрийн турш үргэлжлэх бөгөөд дартс, волейбол, хөлбөмбөг, үндэсний бөхийн төрлүүдээр өрсөлдөхөөс гадна сум бүхэн ая дууны мэндчилгээ, урлагийн тоглолт, бүжгийн үзүүлбэртэй оролцох аж.