ДОРНОД АЙМАГ: Боомт, хил орчмын ариун цэврийн байгууламжийг нэмэгдүүлнэ

Дорнод аймгийн Хил хамгаалах туслах хүчний зөвлөлийн зөвлөгөөн Халхгол суманд болж, 2026 оны эхний хагас жилд хэрэгжүүлсэн ажлын үр дүнг хэлэлцэн, цаашдын үйл ажиллагааны төлөвлөгөөг баталлаа.

Дорнод аймаг нь хоёр улстай хиллэдэг, стратегийн өндөр ач холбогдолтой бүс нутаг учраас улсын хилийн халдашгүй дархан байдлыг хангах, хилийн дэглэмийг сахиулахад Хил хамгаалалтад туслах хүчний оролцоо чухал болохыг зөвлөгөөний үеэр онцолсон юм.

Аймгийн Засаг дарга, Хил хамгаалах туслах хүчний зөвлөлийн дарга Ш.Ёл ирэх онд хил болон хил орчмын дэглэмийн зөрчлөөс урьдчилан сэргийлэх, зөрчлийг шуурхай илрүүлж таслан зогсоох чиглэлээр хамтын ажиллагааг эрчимжүүлэх шаардлагатайг тэмдэглэлээ.

Мөн хил орчмын экологийг хамгаалах, хүрээлэн буй орчны эсрэг гэмт хэргээс урьдчилан сэргийлэх, хилчид, хил орчмын малчид болон туслах хүчний гишүүдэд урьдчилан сэргийлэх эрүүл мэндийн үзлэг, үйлчилгээ үзүүлэх, орон нутгийн иргэдэд хил хамгаалах байгууллагын үйл ажиллагааг сурталчлах, соёл урлагийн арга хэмжээ зохион байгуулах ажлыг хэрэгжүүлэхээр төлөвлөж байна.

Түүнчлэн хил залгаа сумдын хамтын ажиллагааг бэхжүүлэх, хил хамгаалалтад туслах хүчний гишүүдийн нэгдсэн цугларалтыг үе шаттай зохион байгуулах, хилийн зурваст мал аж ахуй эрхлэх, отор хийх, хадлан хадах, мод бэлтгэх зөвшөөрлийг хууль, журмын дагуу олгох тогтолцоог сайжруулахад анхаарах юм.

Үүнээс гадна хил орчмын ой, хээрийн түймрээс урьдчилан сэргийлэх, унтраах ажиллагаанд Онцгой байдлын байгууллагатай хамтран ажиллаж, шаардлагатай техник, багаж хэрэгслээр хангах, боомт болон хил орчмын хогийн цэг, ариун цэврийн байгууламжийг нэмэгдүүлэх, хүүхэд хамгаалал, гэр бүлийн тогтвортой байдлыг дэмжих чиглэлээр тодорхой ажлуудыг хэрэгжүүлэхээр боллоо.