Дорнод аймгийн 8 дахь суманд төрийн албан хаагчийн орон сууц ашиглалтад орлоо

Дорнод аймагт төрийн албан хаагчдын ажиллах орчин, нийгмийн баталгааг сайжруулах чиглэлээр хэрэгжүүлж буй орон сууцны бүтээн байгуулалт үргэлжилсээр байна. Энэ хүрээнд Сэргэлэн суманд төрийн албан хаагчийн орон сууц ашиглалтад орж, өнөөдөр шинэ байрандаа орох 7 өрхөд түлхүүрийг нь гардуулан өглөө.

Түлхүүр гардуулах арга хэмжээнд УИХ-ын гишүүн М.Бадамсүрэн, У.Отгонбаяр, аймгийн Засаг дарга Ш.Ёл нар оролцож, иргэдэд баяр хүргэн шинэ орон сууцны батламжийг гардуулсан байна.

Энэхүү төсөл нь Дорнод аймгийн төсвийн 70 хувь, сумын төсвийн 30 хувийн санхүүжилттэйгээр хэрэгжиж байгаа бөгөөд өнгөрсөн жилүүдэд Баян-Уул, Баяндун, Гурванзагал, Дашбалбар, Матад, Чойбалсан, Чулуунхороот, Сэргэлэн сумдад нийт 76 айлын орон сууцны барилга ашиглалтад оржээ.

Мөн энэ онд бүтээн байгуулалтын ажлыг үргэлжлүүлэн улсын төсөв болон аймаг, сумдын хамтарсан санхүүжилтээр 6 суманд 64 айлын орон сууцны барилгын ажлыг хэрэгжүүлж байгаа аж.

Төрийн албан хаагчдыг тогтвортой ажиллуулах, орон нутагт ажиллаж амьдрах нөхцөлийг бүрдүүлэхэд энэхүү төсөл чухал хувь нэмэр оруулж байна.