Ерөнхий сайд, УИХ-ын даргыг огцруулах асуудлыг ил санал хураалтаар шийдвэрлэнэ

УИХ-ын гишүүн П.Сайнзоригийн албан бланктай, Засгийн газрыг огцруулах албан бичигт 40 гаруй гишүүн гарын үсгээ зурсан. УИХ-д өнөөдөр хүргүүлнэ. Үндсэн хуульд зааснаар 32-оос дээш гишүүн дэмжсэн тохиолдолд уг саналыг УИХ 3 хоногийн дотор хэлэлцэж, 64-өөс дээш гишүүн “гараа өргөвөл” Ерөнхий сайд огцорно. Ерөнхий сайд огцорсон бол Засгийн газар огцорсонд тооцдог хуулийн заалттай. Мөн УИХ-ын нэр бүхий гишүүд УИХ-ын даргыг огцруулах бичигт гарын үсэг цуглуулж эхэлсэн. УИХ-ын 64-өөс дээш гишүүн УИХ-ын даргыг огцруулах үндэслэл бүхий саналыг дэмжсэн бол УИХ-ын даргыг огцруулна.  

Үндсэн хуулиас

• Дөчин гуравдугаар зүйл.
• 1.Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ. Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно.
• 2.Ерөнхий сайд огцорвол Засгийн газар бүрэлдэхүүнээрээ огцорно.

Үндсэн хуулиас

• Хорин дөрөвдүгээр зүйл.
• 2.Улсын Их Хурлын дарга, дэд даргын бүрэн эрхийн хугацаа дөрвөн жил байх бөгөөд хуульд заасан үндэслэлээр хугацаанаас нь өмнө чөлөөлж, огцруулж болно.

УИХ-ын тухай хуулиас

• 12.2.3.Улсын Их Хурлын нийт гишүүний олонх Улсын Их Хурлын даргыг огцруулах үндэслэл бүхий санал гаргасныг Улсын Их Хурал хүлээн зөвшөөрсөн.
• 12.3.Улсын Их Хурлын даргыг чөлөөлөх, огцруулах асуудлыг Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэж, чөлөөлөх, огцруулах асуудлыг ил санал хураалтаар шийдвэрлэнэ. Улсын Их Хурлын даргыг чөлөөлөх, огцруулахыг хуралдаанд оролцсон гишүүдийн олонх дэмжсэн бол энэ тухай тогтоол баталсанд тооцно.