Жил бүрийн 10, 11 дүгээр сард хүүхэд хохирсон гэмт хэргийн тоо өсдөг

Цагдаагийн ерөнхий газрын Урьдчилан сэргийлэх алба, CU, GS25 байгууллага хамтран “365 анхаарч, хайрлая” аяны талаар мэдээлэл өглөө. 

ЦЕГ-ын Урьдчилан сэргийлэх газрын Гэр бүлийн хүчирхийлэл, хүүхдийн эсрэг гэмт хэрэг, зөрчлөөс урьдчилан сэргийлэх хэлтсийн дарга, Цагдаагийн дэд хурандаа Д.Будзаан "Жил бүрийн 10, 11 дүгээр сард хүүхэд хохирсон гэмт хэрэг улсын хэмжээнд өсдөг.

Үүнээс урьдчилан сэргийлэх зорилгоор “365 анхаарч, хайрлая” аяныг улсын хэмжээнд зохион байгуулахаар төлөвлөж, бэлтгэл ажлыг хангалаа. 

Энэ жилийн эхний 10 сарын байдлаар улсын хэмжээнд хүүхэд хохирсон гэмт хэрэг 11 хувиар буурсан. Гэхдээ 2100 орчим хүүхэд гэмт хэргийн улмаас хохирсон байна. Хүүхэд үйлдсэн 846 гэмт хэрэг бүртгэгдсэн. Энэ нь мөн 5-6 хувиар буурсан үзүүлэлт" гэлээ.

Энэ удаагийн аяны хүрээнд эцэг эхийн үүрэг хариуцлага, хүүхдийн хүмүүжил төлөвшил, хорт зуршлаас урьдчилан сэргийлэх соён гэгээрүүлэх чиглэлээр эцэг эх, асран хамгаалагчийн хариуцлагыг нэмэгдүүлж, хүүхэдтэй зөв харилцах олон нийтийн хандлага, ойлголтыг сайжруулснаар хүүхдийн эрхийг хамгаалах, зөв төлөвшил, хүмүүжил бүхий иргэн оролцоог нэмэгдүүлэх чиглэлээр арга хэмжээг зохион байгуулахаар төлөвлөж байгаа аж.